BINAMU YANGU KANIBAKA NA KUNIPA MIMBA...............

Mkazi mmoja wa kijiji cha Mloe, mkoani Kilimanjaro aliyejulikana kwa jina moja la Agustin (47) anadaiwa kumbaka na kumpa mimba binamu yake mwenye umri wa miaka 16 (jina linahifadhiwa) aliyekuwa kidato cha pili katika shule ya sekondari ya Okaoni Septemba mwaka jana huko Dakau, Kibosho.

Akielezea tukio hilo, msichana huyo ambaye sasa amejifungua, alisema shangazi yake ambaye hana msaidizi nyumbani kwake, alimpigia simu bibi yake anayeishi naye, akimuomba yeye aende kumsaidia kufua nguo.

Alipokwenda, kwanza aliambiwa atoe mbolea katika zizi la ng’ombe lakini akiwa huko, binamu yake, ambaye ni mtoto wa mama yake mkubwa, alimfuata na kutaka kumbaka, kabla ya kufanikiwa kukimbia.

Alisema alipomweleza shangazi yake kuhusu suala hilo, alimjibu kwa kilugha akimwambia kuwa asimwambie upuuzi, kitu ambacho kilimuuma binti huyo ambaye wakati huo alikuwa na umri wa miaka 15.

“Niliondoka baada ya shangazi kunijibu hivyo. Nikiwa nafua nguo, Agustin aliniita ndani, nikajua ananipa zingine ili nifue, lakini nilipoingia alinishika mkono na kunivutia chumbani kwake, akaniambia ole wangu nikipiga kelele au kumwambia mtu, atanifanyia kitu ambacho sitasahau, aliniziba mdomo, akanivua ngua na kuanza kuniingilia,” alisema binti huyo.

“Nilisikia maumivu makali sana, nikamwambia shangazi, lakini hakutaka kunisikiliza, nikamweleza pia yeye mwenyewe Agustin kuwa nimeumia sana, hakunijibu. Kesho yake aliniletea dawa nimeze, nikameza nikarudi kwa bibi yangu. Baada ya miezi 6 nikasikia tumbo linauma, nikajua nina minyoo nikamwambia shangazi akanipa dawa za minyoo, nikazimeza, hata hivyo sikuona dalili za kupona.

“Nikamwambia Agustin naumwa  tumbo, akaniambia nioge anipeleke hospitali, nilipima nikakutwa nina mimba ya miezi 5, alinichukua akanipeleka hospitali ya Mawezi, akaongea na daktari mmoja akampa dawa, sikujua ni za nini nilipotumia nilipatwa na kizunguzungu, kumbe zilikuwa ni za kutoa mimba, pia alinipeleka Arusha Mianzini kwenda kutoa mimba kwenye dispensari iliyoko huko, akapewa dawa anipe wakati tukiwa tumefika nyumbani.”

Baada ya zoezi hilo kushindikana, msichana  huyo alisema dada wa Agustin aitwaye Aniseta alimpigia simu rafiki yake mmoja aishiye Dar akimuomba aje Moshi kuna kazi anataka amsaidie.Inadaiwa kuwa rafiki huyo anayetajwa kwa jina moja la Najma alitumiwa nauli ya shilingi laki moja aende Moshi na alipofika, alimwambia kuwa kaka yake amempa mimba mtoto wa ndugu yake hivyo  wanataka wamtoroshe kumpeleka Dar akae mpaka ajifungue kwani kule polisi na walimu wanamfuatilia ili wamfunge.

Najma alipatikana na kukiri kwenda Moshi kumfuata binti huyo, lakini alipofika naye Dar, rafiki yake alipigia simu na kumtaka amdhuru binti huyo ili kupoteza ushahidi, jambo ambalo alilipinga licha ya wito wao wa mara kwa mara.

Mwenyekiti wa kijiji cha Mloe, Salutary Mushi naye alisema ni kweli Agustin ana tabia ya kupenda kutoka na watoto wadogo, jambo ambalo limekuwa kero kubwa mtaani hapo kwani huyu si mtoto wa kwanza kumharibia maisha, akidai pia kuwahi kufanya hivyo kwa mtoto wa baba yake mkubwa.

Agustin mwenyewe hakupatikana licha ya kuwepo habari za kuachiwa kutoka kituo cha Polisi Moshi alikopelekwa kwa kosa hilo lililofunguliwa kwa faili namba MS/RB3336/014.

SHIRIKA LA MAGEREZA KUINGIA UBIA WA UCHIMBAJI MADINI YA CHOKAA NA KAMPUNI YA TWIGA CEMENT YA JIJINI DAR ES SALAAM

Kamishna Jenerali wa Jeshi Magereza John Casmir Minja(kushoto) akiwa  na Mkurugenzi Mtendaji wa Kampuni ya Twiga Cement, Bw. Alfonso Rodrudges(kulia) kabla ya kusaini Makubaliano ya ubia kati ya Shirika la Magereza na Kmapuni hiyo ya uchimbaji madini ya chokaa katika eneo la Gereza Wazo Hill leo Agosti 21, 2014 Jijini Dar es Salaam Maafisa Wandamizi wa Jeshi la Magereza walioshiriki hafla ya utilianaji sahini Makubaliano ya ubia huo wakimsikiliza Mtaalam Mshauri wa Kampuni ya Twiga Cement, Bw. Said Abdallah(hayupo pichani) namna Jeshi la Magereza litakavyonufaika na mradi huo wa madini.

Baadhi ya Maafisa Waandamizi wa Jeshi la Magereza wakishuhudia utiaji sahini wa Makubaliano ya ubia wa mradi wa uchimbaji madini ya Ujenzi katika Gereza Wazo Hill Jijini Dar es Salaam. Kamishna Jenerali wa Jeshi la Magereza, John Casmir Minja(kushoto) na  Mkurugenzi Mtendaji wa Kampuni ya Twiga Cement, Bw. Alfonso Rodrudges(kulia)  wakibadilishana nyaraka muhimu za Makubaliano ya ubia kati ya Shirika la Magereza na Kampuni ya Twiga Cement katika mradi wa uchimbaji madini ya chokaa katika eneo la Gereza Wazo Hill Jijini Dar es Salaam(Picha zote na Lucas Mboje wa Jeshi la Magereza).

Kamishna Jenerali wa Jeshi la Magereza John Casmir Minja(kushoto) akiwa na Mkurugenzi Mtendaji wa Kampuni ya Twiga Cement, Bw. Alfonso Rodrudges(kulia) wakisaini nyaraka muhimu za Makubaliano ya ubia katika mradi wa uchimbaji madini ya chokaa katika eneo la Gereza Wazo Hill.

Na; Lucas Mboje

Jeshi la Magereza nchini kupitia Shirika lake la Magereza limeingia makubaliano rasmi ya mradi wa uchimbaji madini ya Chokaa na Kampuni ya Saruji ya Twiga katika eneo la Gereza Wazo Hill Jijini Dar es Salam.

Makubaliano hayo yamefanyika leo Alhamisi 21 Agosti, 2014 katika Ukumbi wa Mkutano wa Makao Makuu ya Jeshi la Magereza Jijini Dar es Salaam.

Akizungumza na Maafisa Waandamizi wa Jeshi la Magereza pamoja na Wanahabari, Kamishna Jenerali wa Magereza nchini, John Casmir Minja amesema kuwa ushirikiano huo kati ya Shirika la Magereza na Twiga Cement unalenga kuimarisha Shirika la Magereza ili liweze kujiendesha kibiashara kwa kuchangamkia fursa mbalimbali za kiuchumi.

Ametaja madini na maeneo ambayo Jeshi hilo litafanya uchimbaji madini kwa ubia ni pamoja na Chokaa, mawe, kokoto, mchanga, zahabu na moramu katika maeneo ya Magereza mbalimbali hapa nchini ambayo ni Maweni(Tanga), Lilungu(Mtwara), Bahi(Dodoma), Msalato(Dodoma), Majimaji(Songea), Kalilankulukulu(Mpanda).

“Tayari Jeshi la Magereza limepata leseni 164 za Uchimbaji wa madini ya Ujenzi, vito na zahabu katika maeneo mbalimbali ya magereza hapa nchini” Alisema Kamanda Minja.

Kamishna Jenerali Minja ameongeza kuwa upatikanaji wa leseni hizo ni mojawapo ya hatua ya kukabiliana na changamoto mbalimbali zinazolikabili Jeshi la Magereza, hususani katika kuipunguzia Serikali gharama za kuhudumia magereza na kuongeza pato la Kodi kwa Taifa.

“Vyanzo vilivyobuniwa kuongeza tija ni pamoja na kuingia ubia na Wawekezaji wenye nia ya dhati ya kushirikiana na Jeshi letu katika madini hayo” Alisisitiza Kamanda Minja.

Kwa upande wake Mkurugenzi Mtendaji wa Kampuni ya Twiga Cement, Bw.Alfonso Rodrudges amesema kuwa Kampuni yake ipo tayari kwa dhati kushrikiana na Shirika la Magereza katika mradi huo wa uchimbaji madini ya ujenzi na kuwa yapo mahitaji makubwa ya bidhaa hiyo katika Ujenzi wa Barabara katika Jiji la Dar es Salaam.

“Makubaliano haya ya ubia yataongezea uhakika wa upatikanaji wa madini ya chokaa katika maeneo ya karibu na Kiwanda chetu hivyo kuongeza uzalishaji wa saruji nchini na kuwa na muda mrefu zaidi(lifespan) wa kuendesha shughuli za Kiwanda chetu” Alisema Bw. Rodrudges.

Pia ameongeza kuwa mbali na kuliongezea mapato Jeshi la Magereza katika mradi huo pia Kampuni yake itatoa fedha kwa ajili ya ujenzi wa nyumba za kuishi Maofisa na Askari wa Gereza Wazo Hill Jijini Dar es Salaam hivyo kupunguza changamoto kubwa ya uhaba wa nyumba za kuishi askari.

Mkakati wa Jeshi la Magereza hivi sasa ni kuendelea kuboresha maeneo mbalimbali pamoja na kuchangamkia fursa zilizopo ili kuhakikisha kuwa linafikia ufanisi unaotarajiwa katika utekelezaji wa majukumu yake.

Makubaliano hayo yatakuwa na manufaa makubwa kwa Shirika la Magereza katika kukuza mtaji na kubadilishana ujuzi katika miradi mbalimbali ya madini hayo.

DIVA AFUNGUKA KUHUSU PENZI LAKE KWA GK

Ile hatua ya U boifriend na U girlfriend ikiwa imepita na kuingia katika hatua ya uchumba wa mahaba kedekede, dada yetu Diva alijikuta anamwaga chozi baada ya watu mbalimbali kumtupia maneno kwamba amempendea King Crazy Gk umaarufu wake ili abaki kupata KIKI Mjini.
Diva alijikuta anatoa maneno makali ya hasira na kuangua kilio na kudai kuwa hajampendea Gk umaarufu wake sababu yeye ni Diva ni maarufu pia hapa Tanzania, hakuishia hapo alizidi kudai ya kuwa amechoshwa na watu wengi kusema ana mahusiano na Gk ambae hana Pesa na ameachana na mwanaume ambae anapesa na cheo kikubwa Tanzania.
Diva:Nimechoshwa kuulizwa maswali ya Prezzo au mwanasiasa sababu huko siko tena na sina mahusiano nao zaidi ya urafiki wa kawaida wa kuongea nao kama watanzania wenzangu na pili amedai kuwa hana hisia zozote za kimapenzi na watu hao sababu yeye yuko na Mpenzi wake na anafurahia mapenzi hayo na mume wake ambae ni Mungu wa Muziki Tanzania.
Diva Binti mwenye mvuto na umbo la kuvutia na mvuto wa sura ya babyface na macho ya duara alidai kuwa King Crazy Gk ni Mtu mwenye kipato kizuri tu ila sio mtu wa kujionyesha au kuishi maisha ya kujionyesha na ni mtu mtaratibu anaeishi maisha yake alioridhika nayo na anatumia pesa zake kulipia elimu na kufanya mambo yake na biashara zake binafsi tofauti na watu wanavyomfikiria. Diva la Diva alisema kuwa Hakumpendea Gk Pesa au Umaarufu wake amempenda yeye kama yeye na anachukia baadhi ya watu kumuingilia kimawazo maisha yake ya mapenzi ambayo mashabiki wengi wameonekana kuvutiwa nayo kupitia mtandao wa instagram.

MBUNGE WA NKASI KUMBE HAMWOGOPI BOSI WAKE WAZIRI MKUU PINDA, AFICHUA SIRI ZA NDANI ZA KAMATI NAMBA MOJA KATIKA KIKAO VYA BUNGE LA KATIBA

  Mjumbe wa Bunge la Katiba, Ali Mohamed Kessy ambaye pia ni Mbunge wa Nkasi Kaskazini (CCM) akiwatangazia waandishi wa habari kuunga mkono muundo wa serikali tatu uwepo katika Katiba Mpya, mjini Dodoma jana. Katikati ni Mwenyekiti wa Kamati namba moja ya bunge hilo, Ummy Mwalimu na Makamu wake, Prof Makame Mbarawa ambao walimwita Kessy kumtaka kukanusha kuhusu taarifa yake ya kuwapo tatizo la akidi kwenye vikao vya kamati. Picha na Emmanuel Herman
 
Dodoma. Jana ilikuwa kama sinema pale viongozi wa Kamati Namba Moja ya Bunge Maalumu walipojikuta wakibishana na mjumbe wao mbele ya waandishi wa habari, huku siri za mambo ya ndani ya vikao zikianikwa hadharani.

Kamati hiyo inaongozwa na Naibu Waziri, Ofisi ya Makamu wa Rais, Ummy Mwalimu na makamu wake ni Waziri wa Sayansi na Teknolojia, Profesa Makame Mbarawa, huku ikiwa imesheheni vigogo wengine wakiongozwa na Waziri Mkuu, Mizengo Pinda.


Viongozi wengine katika kamati hiyo ni Waziri wa Nchi, Ofisi ya Waziri Mkuu (Uhusiano na Uratibu), William Lukuvi, Waziri wa Nchi, Ofisi ya Rais (Utawala Bora), George Mkuchika na Waziri wa Ulinzi na Jeshi la Kujenga Taifa, Dk Hussein Mwinyi.
Wamo pia Waziri wa Afya na Ustawi wa Jamii, Dk Seif Rashid, Waziri wa Kazi na Ajira, Gaudensia Kabaka na Naibu Waziri wa Maendeleo ya Jamii, Jinsia na Watoto, Dk Pindi Chana.


Jana asubuhi, Mwalimu na Profesa Mbarawa walifika mbele ya waandishi wa habari katika Hoteli ya St Gasper wakiwa wameambatana na mmoja wa wajumbe wa kamati hiyo ambaye pia ni Mbunge wa Nkasi Kaskazini (CCM), Ally Keissy.


Lengo la mwenyekiti na makamu wake lilikuwa ni kumbana Keissy ili akanushe taarifa aliyoitoa juzi kwenye moja ya televisheni kwamba kamati hiyo inaongoza kwa kuvunja kanuni hasa katika suala la akidi ya vikao kutotimia.


Sinema ilivyoanza
Walipofika mbele ya waandishi wa habari, Keissy alipewa fursa ili akanushe taarifa yake, lakini alibadili mada na kuanza kuzungumzia masuala ya muundo wa Serikali na Bunge, huku akisema yeye ni muumini wa serikali tatu na siyo mambo ya serikali mbili zinazopendekezwa na wengi kutoka katika chama chake.
Kauli hiyo iliwashtua Mwalimu na Profesa Mbarawa ambao walianza kumkatisha ili asiendelee.


“Keissy sikukuitia mambo hayo, huu ni mkutano wangu, naomba ukanushe nilichokuitia, hayo utazungumza baadaye tafadhali sana,” alisema Mwalimu.
Wakati huo Profesa Mbarawa na waandishi wa habari waliokuwapo walivunjika mbavu kwa vicheko, huku yeye akiendelea kusisitiza kwamba ni muumini wa Tanganyika.


Wakati akisema hayo, Profesa Mbarawa naye aliingilia kati na kumtaka Keissy kueleza kilichompeleka hapo huku akimtaka aache kelele za kupotosha wananchi kwa kuwa anachosema siyo kweli.


Alipopewa nafasi ya kuzungumzia jambo hilo, Keissy alisema: “Jana (juzi), mimi nilihesabu mara mbili nikaona Zanzibar hawajatimia lakini kumbe mmoja nilimfanya akawa mtu wa Tanganyika, kwa hilo nilighafilika, lakini mle ndani mambo siyo mazuri,” alisema Keissy.
Kabla hajaendelea Mwalimu alidakia na kumtaka anyamaze kimya kwa kuwa huo haukuwa mkutano wake, ili yeye (Mwalimu) aendelee kueleza mambo yaliyojiri ndani ya kamati.


“Jamani waandishi si mnaona amekanusha, huu ni mkutano wangu na yeye sitaki azungumze mambo ya mle ndani kwa kuwa msemaji ni mimi au makamu wangu au mtu yeyote atakayeteuliwa na mwenyekiti, sasa tunaendelea,” alisema Mwalimu.
Mara baada ya Mwalimu kutoa taarifa ya kamati yake kwa waandishi wa habari na kumaliza kujibu maswali, alinong’ona na Profesa Mbarawa na hapo wakampa nafasi Keissy ili azungumze kwa ufupi mambo yake lakini palepale mbele yao.


Kauli za Keissy
Akitumia fursa hiyo, Keissy alisema: “Kuna mambo yanafanywa mle ndani ambayo mimi na wenzangu wengine tunalazimishwa, hatukubaliani nayo likiwamo suala la kuizika Serikali ya Tanganyika wakati wa upande wa pili (Zanzibar) wanapewa nafasi na kunufaika na rasilimali za nchi hii, ndugu zangu huu ni uonevu.”


Alisema uonevu huo umekuwa mkubwa kwa wabunge wa Tanzania Bara ukilinganisha na wenzao wa Zanzibar ambao alisema wanakula fedha nyingi za bure ilihali hawafanyi kazi za Tanganyika.


“Ndugu zangu, hapa tusidanganyane, we fikiria watu zaidi ya 50 wanatoka kule Zanzibar na kuja kutuamulia mambo yetu, hii si halali hata kidogo. Haiwezekani mtu wa Zanzibar akaja kuzungumzia masuala ya Nkasi wakati hayajui,” alisema.


Alisema kuwa msimamo wake siku zote ni serikali tatu na kwamba hatayumbishwa na vitisho au jambo la aina yoyote hata kukiwa na kulazimishwa.
Mbunge huyo alisema kuwa kutakuwa na urahisi wa kuongoza Serikali kama Tanganyika itapewa hadhi yake kuliko ilivyo sasa kwa serikali mbili zinazopigiwa upatu.


Kwa mapendekezo yake alisema ni vyema likawepo Bunge la Tanganyika, Bunge la Zanzibar na kisha miongoni mwa wabunge hao, wachaguliwe wachache kuunda Bunge la Muungano.
Aliendelea kusisitiza kuwa wabunge kutoka Zanzibar wanawanyonya wenzao wa Tanzania Bara kwa kila kitu kauli ambayo ilionekana kumkera Profesa Mbarawa na kuamua kumkatisha asiendelee kuzungumza.


Wakati akiendelea kuzungumza, viongozi hao walimkatisha tena na kumwambia akubali waondoke pamoja kuendelea na vikao vya kamati. Baada ya hapo, Mwalimu na Profesa Mbarawa walinyanyuka na kuanza kuondoka, lakini Keissy alisimama na kuendelea kuzungumza na waandishi wa habari.
Baada ya kuona anaendelea, Profesa Mbarawa alirudi na kumshika mkono Kessy huku akisema; “Mheshimiwa Keissy twende bwana, maana ukimwacha huku huyu atazungumza mambo mengi.”


Wakati akiondoka eneo hilo, Keissy alipaza sauti akiwaambia waandishi wa habari: “Angalieni tunavyodhibitiwa, lakini msimamo ni huo wala sitayumba ngoja tukaendelee lakini mimi ndiyo mtoa habari namba moja.”
Msimamo wa serikali tatu ni wa Umoja wa Katiba ya Watanzania (Ukawa) waliosusia Bunge

MFANYAKAZI WA HOSPITALI YA PERAMIHO AJINYONGA

 

Mwili wa Fredrick Mgaya (60) ukiwa unaning’inia katika mti aliojinyongea , Tunaomba radhi kwa picha hii.

Na Mwandishi wetu Peramiho

 Songea Mwanaume mmoja Fredrick Mgaya (60), mkazi wa Peramiho, Songea mkoani Ruvuma amejinyonga usiku wa kuamkia leo katika maeneo yaliyo karibu na viwanja vya michezo vya Abasia kijijini Peramiho.Mwanaume huyo aliyekuwa akifanya kazi kitengo cha maabara katika Hospitali ya Peramiho na kustaafu mnamo mwezi aprili mwaka huu amekutwa amejinyonga majira ya asubuhi ya leo. Marehemu Fredrick Mgaya amekutwa na ujumbe katika mfuko wa shati lake, ulioelezea chanzo kilichopelekea yeye kujitoa uhai. Afande Allen Urio ambaye alikuwa mmoja wa mashuhuda wa kwanza,anasema “ Nilikuwa natoka lindo asubuhi ndipo nikakuta kundi la wanafunzi wa shule ya msingi wakiwa njiani, nikawauliza kwanini wamesimama badala ya kwenda shule muda ule, ndipo waliponiambia kuna mtu ananing’inia kwenye mti pale.

Nilipofika kwenye mti huu ndipo nilipomkuta mzee wetu Fredrick Mgaya akiwa ameshapoteza maisha.  

Ni tukio la kusikitisha sana kwani ni mzee wetu katika jamii ambaye tulikuwa tunaishi naye vizuri. Mbali na migogoro yake na mkewe lakini uamuzi aliouchukuwa unasikitisha na si mzuri kabisa.

Kama mlinda amani katika jamii napenda kuwaasa wananchi wajaribu kutafuta suluhu ya matatizo kwa namna nyingine na sio kwa kujitoa uhai”

Akiongea  Hakimu wa mahakama ya mwanzo kijijini Peramiho bi Maria Sambo amesema, ameshaletewa na kusuluhisha migogoro ya ndoa hiyo ya marehemu mara mbili na hadi sasa kuna kesi inayoendelea katika mahakama ya Hakimu mkazi, lakini  kwa hali ya kawaida hakudhani kwamba marehemu Fredrick Mgaya angefikia hatua hiyo ya kujitoa uhai.

Nao mashuhuda wa tukio hilo wakiongea kwa masikitiko, wengi wamelaani uamuzi uliofikiwa na mzee Mgaya kwani ni dhahiri alikuwa ni mtu wa watu na pia alikuwa ni tegemeo la familia yake ambayo amewaacha ghafla.

Uamuzi ambao umesababisha maumivu kwa wanajamii hususan ndugu, jamaa pamoja na marafiki wengi waliokuwa wakimpenda na kushirikiana naye kwa mambo mengi ya kimaisha.

Mwenyekiti wa kijiji cha Peramiho A Bwana Joseph Ngonyani ameonesha masikitiko yake ya dhati kwa kuondokewa na moja ya wazee aliokuwa akiwategemea kwa ushauri katika kijiji chake.

 “Tukio hili linagusa sana unajua, kwasababu linahusu mtu wa karibu sana na ambaye tunashinda nae siku zote bila kujua nini kinamsibu na nini anakipanga katika akili yake”.

Ndoa nyingi sana zinasumbuliwa na migogoro ya hapa na pale, hivyo ni vizuri watu wa ustawi wa jamii na asasi zinazohusiana na jamii kujaribu kutoa mafunzo na maelekezo ya jinsi ya kutatua migogoro hiyo ili kuepusha adha kama hii isijitokeze tena ndani ya jamii yetu.

Alisema mmoja wa mashuhuda wa tukio hilo bwana Ignasi Kapinga.

 Winfried Thadei Mgaya, mdogo wa marehemu anasema, amepokea tukio hilo kwa mshtuko na kwa majonzi sana. Anapata uchungu sana juu ya msiba wa kaka yake kwani marehemu ameacha watoto wanne ambao bado ni tegemezi pamoja na mjane. Pia amesema mazishi yatafanyika tarehe 7 jumamosi  kijijini kwao Madaba, Songea mkoani Ruvuma.Habari kwa hisani ya Demashonews

RAIS KIKWETE ASAFIRI KWA TRENI YA TAZARA KATIKA ZIARA YAKE YA MKOA WA MOROGORO

Mke  wa Rais Mama Salma Kikwete akipanda treni ya TAZARA kuelekea Kisaki Mkoani Morogoro akiwa katika ziara yake ya mkoa huo

Rais Jakaya Mrisho Kikwete akipanda treni ya TAZARA kuelekea Kisaki Mkoani Morogoro akiwa katika ziara yake ya mkoa huo

Mkuu wa Mkoa wa Morogoro Mhe Joel Bendera, Mbunge wa Morogoro Kusini  Mhe Innocent Kalogeris na Katibu wa Rais Bw. Prosper Mbena wakiongea ndani ya behewa maalum la VIP la treni la TAZARA wakati wa safari ya Rais Kikwete kuelekea Kisaki mkoani Morogoro 

Mama Salma Kikwete, Waziri wa Ujenzi Dkt John Pombe Magufuli, Mkurugenzi Mkuu wa TAZARA Bw. Ronald Phiri (kulia) na viongozi wengine ndani ya behewa maalum la VIP la treni la TAZARA wakati wa safari ya Rais Kikwete kuelekea Kisaki katika ziara yake ya mkoa wa  Morogoro 

Rais Jakaya Mrisho Kikwete akiwa ndani ya behewa maalum la VIP la treni la TAZARA wakati wa safari ya Rais Kikwete kuelekea Kisaki katika ziara yake ya mkoa wa  Morogoro 

Rais Jakaya Mrisho Kikwete akipokea kutoka kwa Mkurugenzi Mkuu wa TAZARA Bw. Ronald Phiri zawadi ya picha ya jengo la makao makuu ya TAZARA akiwa ndani ya behewa maalum la VIP la treni la TAZARA wakati wa safari ya Rais Kikwete kuelekea Kisaki katika ziara yake ya mkoa wa  Morogoro 

Rais Jakaya Mrisho Kikwete akipokea kutoka kwa Mkurugenzi Mkuu wa TAZARA Bw. Ronald Phiri zawadi ya picha ya jengo la makao makuu ya TAZARA akiwa ndani ya behewa maalum la VIP la treni la TAZARA wakati wa safari ya Rais Kikwete kuelekea Kisaki katika ziara yake ya mkoa wa  Morogoro 

Rais Jakaya Mrisho Kikwete na Mama Salma Kikwete wakiwa na viongozi wengine ndani ya behewa maalum la VIP la treni la TAZARA wakati wa safari ya Rais Kikwete kuelekea Kisaki katika ziara yake ya mkoa wa  Morogoro 

Rais Jakaya Mrisho Kikwete na Mama Salma Kikwete wakiwasili katika kituo cha Kisaki baada ya kusafiri kwa treni katika ziara yake ya Mkoa wa Morogoro

Rais Jakaya Mrisho Kikwete na Mama Salma Kikwete wakiwasili katika kituo cha Kisaki baada ya kusafiri kwa treni katika ziara yake ya Mkoa wa Morogoro

Rais Jakaya Mrisho Kikwete na Mama Salma Kikwete wakilakiwa na umati mkubwa wa watu baada ya kuwasili katika kituo cha Kisaki baada ya kusafiri kwa treni katika ziara yake ya Mkoa wa Morogoro

Rais Jakaya Mrisho Kikwete na Mama Salma Kikwete wakwipungia mkono umati mkubwa wa watu baada ya kuwasili katika kituo cha Kisaki baada ya kusafiri kwa treni katika ziara yake ya Mkoa wa Morogoro

Rais Jakaya Mrisho Kikwete akiisalimiana na wananchi baada ya kuwasili Kisaki mkoani Mororogoro.

 

Rais Jakaya Mrisho Kikwete akimsikiliza Waziri wa Ujenzi Dkt John Pombe Magufuli akitoa maelezo ya maendeleo ya ujenzi wa miundombinu mbalimbali katika mkoa wa Morogoro

WATOTO WACHOMWA MOTO MIKONO NA MZAZI WAO

  Awachoma moto mikononi kwa tambi za jiko
  Kisa:Walichelewa nyumbani kutoka kuangalia tv

Watoto wanaodaiwa kufanyiwa ukatili wakionyesha vidonda kwenye mikono yao ambavyo vinatokana na kuchomwa moto na baba ya mzazi nyumbani kwao Mbagala Kibondemaji jijini Dar es Salaam jana. Picha/ Omar Fungo

Vitendo vya ukatili dhidi ya watoto vinavyofanywa na baadhi ya wazazi, vimezidi kukithiri nchini baada ya watoto wawili kudaiwa kuchomwa moto mikono na baba yao kwa kutumia tambi za jiko jijini Dar es Salaam. Katika tukio hilo, anayetuhumiwa kufanya unyama huo ni Salum Juma, fundi gereji wilayani Temeke, mkazi wa Mbagala Kibonde Maji, jijini Dar es Salaam.
Watoto hao mmoja mwenye umri miaka saba na mwingine miaka mitano (majina yao yamehifadhiwa), akiwamo wa  kumzaa na wa kufikia walikutwa na mkasa huo baada ya kwenda kuangalia runinga kwa jirani na kurudi nyumbani saa 5:00 usiku Alhamisi wiki iliyopita.
Akizungumza na NIPASHE, jirani yao, Omar Fusi, alidai watoto hao walieleza kuwa walichomwa na baba yao na kufichwa ndani, lakini baadaye majirani waliwaona watoto hao wakiwa na majeraha.
Fusi alisema baada ya kuwaona wakiwa na majeraha, waliwahoji ambapo walieleza kuwa walichomwa na baba yao baada ya kuchelewa kurudi kutoka kuangalia televisheni.
Kwa mujibu wa Fusi, kitendo hicho kilifanyika huku mama yao akiwa kwenye biashara zake za kukaanga mihogo.
Fusi alisema baada ya kubaini tukio hilo alitoa taarifa kwa Mwenyekiti wa Serikali ya Mtaa wa Kibonde Maji ‘B’, Teofile Balae, ambaye alitoa taarifa kwa Ofisa Ustawi wa Jamii kata ya Mbagala, Eliameresa Kaaya na kuripoti polisi na kufanikisha baba huyo kukamatwa na kupelekwa katika Kituo cha Polisi Maturubai ambako anaendelea kushikiliwa.
Balae alisema baada ya kushirikiana na Ofisa Ustawi wa Jamii na baba huyo kukamatwa, waliwachukua watoto hao na kuwapeleka Kituo cha Polisi Mbagala Kuu kwa ajili ya kupata fomu ya PF3 na kuwapeleka katika hospitali ya Mbagala Rangi Tatu kupatiwa matibabu.
Mmoja wa wakazi wa eneo hilo, Erasto Kibara, alisema walibaini watoto hao kufanyiwa ukatili huo baada ya kumkuta mmoja wao adukani alikotumwa akiwa na majeraha na kumuuliza kilichompata kisha alitoa taarifa hizo kwa mwenyekiti wa mtaa huo.
Ofisa Ustawi wa Jamii, Kaaya, akizungumza na NIPASHE katika Kituo cha Polisi Maturubai wakati watoto hao wakichukuliwa maelezo na polisi,  alisema kitendo walichofanyiwa watoto hao ni cha kikatili na kuwataka wananchi kutoa taarifa pale wanapogundua ukatili katika mitaa yao ili kutokomeza vitendo hivyo vilivyoshika kasi nchini.
NIPASHE iliwashuhudia watoto hao katika Kituo cha Polisi Maturubai huku wakiwa na majeraha mkononi wakati wakichukuliwa maelezo na maofisa wa polisi wa kituo hicho.
Mganga Mfawidhi wa hospitali ya Mbagala Rangi Tatu, Dk. Julius Nyakazilibe, alithibitisha watoto hao kupokelewa hospitalini hapo na kupatiwa huduma ya matibabu kutokana na majeraha yaliyosababishwa na moto.
“Ni kweli watoto hao tuliwapokea hapa hospitalini wakiwa na Ofisa Ustawi wa Jamii na walipatiwa matibabu,” alisema Dk. Nyakazilibe. Mama mzazi wa watoto hao, Christina Menasi, akiwa katika kituo cha polisi na mtoto wake mchanga huku akimnywesha uji, alisema wakati wa tukio hilo, alikuwa katika biashara yake ya kuchoma mihogo na aliporudi nyumbani na kukuta hali hiyo, aliingiwa na hofu ya kuripoti tukio hilo kwa kumhofia mumewe.
Mama huyo alilaani kitendo hicho cha kikatili lakini alisema akifungwa yeye ndiye atakuwa na mzigo mkubwa wa kulea familia hiyo.
“Inatakiwa tuache vitendo hivi vya kikatili, lakini ikiwa mume wangu atafungwa, mimi ndiye nitakayebeba mzigo wa kulea hii familia,” alisema Christina.
Kamanda wa Polisi Mkoa wa Temeke, Kihenya Kihenya, alithibitisha kutokea kwa tukio hilo na kusema kuwa mtuhumiwa anashikiliwa katika Kituo cha Polisi Maturubai na kwamba upelelezi unaendelea kabla ya kufikishwa mahakamani ili sheria ichukue mkondo wake.

CHANZO: NIPASHE

BALOZI IDDI AFUNGUA RASMI MICHUANI YA MAJESHI YA AFRIKA MASHARIKI LEO MJINI ZANZIBAR.

 Makamu wa Pili wa Rais wa Zanzibar Balozi Seif Ali Iddi kwa niaba ya Rais wa Zanzibar na Mwenyekiti wa Baraza la Mapinduzi Dr. Ali Mohd Shein akiifungua rasmi michezo ya Majeshi ya Afrika Mashariki, kwenye Uwanja wa Amani mjini zanzibar leo.

 Kikundi cha Utamaduni cha Jeshi la Kujenga Uchumi Zanzibar      { JKU } Kitoa burdani wakati wa ufunguzi wa michezo ya majeshi ya Afrika ya Mashariki kwenye uwanja wa amani mjini Zanzibar.

 Vijana wa jeshi la Rwanda wakifanya vitu vyao walipocheza ngoma ya asili ya nchi hiyo kwenye ufunguzi wa michezo ya Majeshi ya Afrika ya Mashariki amani Mjini Zanzibar.

 Vijana wa Jeshi la Wananchi wa Tanzania { JWTZ } wakirusha njiwa hewani kama ishara ya ufunguzi baada ya kumalizika kwa Hotuba ya ufunguzi wa mashindano ya michezo ya majeshi ya afrika mashariki.

 Balozi Seif akiwa katika picha ya pamoja na Timu ya Soka ya Burundi kabla ya kuanza kwa pambano lake dhidi ya Tanzania mara baada ya kuzindua rasmi michezo ya majeshi ya afrika ya Mashariki kwa niaba ya Rais wa Zanzibar Dr. Ali Mohd Shein.

 Balozi Seif akiwa katika picha ya pamoja na Mkuu wa Majeshi, waamuzi na wadhamini wa michuano hiyo. Picha na Hassan Issa wa – OMPR – ZNZ.

Rais wa Zanzibar na Mwenyekiti wa Baraza la Mapinduzi Dr. Ali Mohd Shein alisema mashindano ya Michezo na Utamaduni ya Majeshi ya Afrika Mashariki ni kielelezo halisi kinachoithibitisha Dunia umoja na mshikamano uliopo wan chi wanachama wa Jumuiya ya Afrika Mashariki.
Alisema michezo hii hutoa msisimko katika kipindi chote cha mashindano na kuacha matokeo mazuri kwa wananchi katika kuipenda jambo ambalo hufufua ari ya kuiendeleza michezo kwa nchi mwenyeji kwa lengo la kuongeza ufanisi wa michezo tofautri ndani ya ukanda wa Afrika Mashariki.
Dr. Shein alisema hayo katika Hotuba iliyosomwa kwa niaba yake na Makamu wa Pili wa Rais wa Zanzibar Balozi Seif wakati akiifungua Michezo ya Majeshi kwa nchi wanachama wa Jumuiya ya Afrika Mashariki kwenye uwanja wa Amani Mjini Zanzibar.
Rais wa Zanzibar alisema kwa kipindi kirefu sasa majeshi ya Afrika Mashariki yamekuwa yakitoa mchango muhimu wa kupata wachezaji wa michezo mbali mbali wakati wanapoziwakilisha nchi wanachma katika mashindano ya Kimataifa.
Alisema baadhi ya Timu za Majeshi katika ukanda wa afrika Mashariki ndizo zinazotoa upinzani mkubwa katika mashindano ya Kitaifa na baadhi yao kuwa mabingwa na kuziwakilishi nchi hizo Kimataifa.
“Wapiganaji wetu wameendelea kuwa wshiriki wazuri katika michezo ya riadha, mbio za Baskeli, kuogelea na michezo mengine “. Alisema Dr. Shein.
Rais wa Zanzibar na Mwenyekiti wa Baraza la Mapinduzi alivipongeza vikosi vyote vya ukanda huu kwa kuzingatia umuhimu wa michezo kwa wapiganaji wao na kuweza kuziwakilisha nchi zao kimataifa.
Aliwanasihi wanamichezo hao majeshi kuendelea na utaratibu wao wa kuifanya michezo kuwa ni miongoni mwa mambo muhimu yanayopaswa wayaendeleze katika vikosi vyao.
Dr. Sheni alitoa wito kwa timu shiriki kwenye mashindano hayo kuweka mikakati kwa kuwaandaa wanamichezo wazuri ambao wataziwakilisha vyema nchi hizi katika mashindano ya kimataifa na kuleta ushindi wa medali tofauti.
Hata hivyop Dr. Sheni alisema kwamba zipo changa moto zilizosababisha Timu za Ukanda wa Afrika mashariki kutokufanya vizuri katika michezo yua madola ilioyomalizika kwenye Mji wa Glasgow huko Uindereza.
Rais Shein aliwapongeza wanamichezo wa Kenya ambao wamefanya vyema kwenye mashindano hayo na kuiosha uso Afrika ya mashariki kwa kurudi na medali nyingi kwenye mashindano hayo.
Alisisitiza umuhimu wa kuandaliwa kwa utaratibu maalum kwa wanamichezo wa majeshi ambao ndio weledi wakubwa katika fani ya michezo mbali mbali kupewa nafasi ya kueneza ujuzi na maarifa yao kwa rais, wafanyakazi wa taasisi za umma pamoja na wanafunzi maskulini.
Alifahamisha kwamba utaratibu huo unaweza kusaidia kupata vipaji vya riadha na michezo mengine kwa wananchi walioko uraiani.
Alieleza kuwa michezo huimarisha ushirikiano na kuleta burdani na furaha mambo ambao ni muhimu hasa kwa watu wanaosimamia na kuyatekeleza majukumu mazito kama ya ulinzi.
Alisema kupitia medani ya michezo majeshi hayo ya afrika mashariki yanaweza kuimarisha uhusiano na kuangalia maeneo mengine mapya ya kushirikiana ili kuzidi kuyamudu vyema majukumu yao.
Alitoa wito kwa majeshi hayo kuityumia fursa hiyo ya michezo katika kubadilishana uzoefu na mbinu mbali mbali za kukabiliana na changamoto zinayoyakabili majeshi hayo wakielewa kwamba wana dhamana ya kusimamia amani na usalama wa wananchi wa afrika mashariki na kuhakikisha ukanda huu ni wenye amani ya kudumu.